琦琦学煲汤煮饭照顾受伤任达华

名模琦琦出席美妆活动，问到早前遇刺的老公任达华（华哥）现时身体状况，她说：「好番啲，康复中，依家要日日做物理治疗。原本我唔太识煮饭，但依家我上网学煲汤煮饭，照顾好老公身体。原本佢唔锺意饮汤，但因为对伤口好一定要佢饮，难得佢认同我厨艺。（你工作有冇影响？）老公最重要，难得佢有假期，我有将出埠工作押后。」任达华目前要留在家中休养，问到他会不会觉得闷？琦琦说：「唔会闷，有屋企人陪佢，大家争煮嘢食畀佢。（皇帝式享受？）唔係，係五星级服务啫，佢想食咩就煮咩。（预计几时会复工？）好快，因为电影《小Q》即将喺香港上映，佢都想出嚟一齐宣传，依家佢日日喺屋企同隻狗倾偈。」

人生最难过Ｍoment

重提当时得知老公受伤的时候，她直言人生中最难过的Ｍoment：「我係最后一个知，因为华哥话唔准讲我知，但之后老板杨受成话做手术一定要家人同意。当时我仲喺北京执紧行李准备飞去上海，突然见到手机微博个Ｍessage话佢受伤，先知道出大事。跟住打畀老公同工作人员都冇人听，心跳加速，几十分钟后了解咗情况，真係人生中最难过嘅Ｍoment，因为唔能够喺佢身边。我上机前华哥打咗麻醉针，所以倾唔到偈，后来航班延误，加上返到香港太大雨，唔可以即刻落机，係最痛苦、最漫长嘅五个小时！」

她指囡囡得知爸爸受伤后大喊：「我好无助，但上机后个女揽住我，我哋一齐祈祷，佢真係贴心小棉袄！之后我有话华哥应该第一时间话我知，佢话唔想我担心，但其实令我更担心！（个熊啤啤係囡囡送畀华哥？）係呀，因为买唔切花，阿女就拎最心爱嘅熊仔送畀华哥，好似我哋陪喺佢身边。」