咁系咪粤语什么意思「我哋以前系咪对港剧有咩误解」

来源：TVB影视大全人气：135更新：2023-03-18 05:50:26

讲起港剧，大家首先会谂到咩？

系每集都做手术，每集都会死人嘅《妙手仁心》？

定系集集爆笑，金句不断嘅《男亲女爱》？

大家第一时间谂到嘅，可能都系港剧嘅好嘢。但系我谂到嘅系，成个童年，我都畀港剧呃紧！

鸡精VS鸡粉

港剧入边，逢系探病，一定会买“鸡精”。仲话“有病冇病，饮啲鸡精补补身！”

所以我每次发烧感冒，第一时间唔系睇医生食药，而系去厨房攞啲“鸡精”（鸡粉）冲水饮！

全部都系广东人

古装剧，明明两个角色都讲紧粤语，但其中一个肯定会讲“听呢位兄台嘅口音，应该系四川人士。”

明明两个都系讲粤语，四川人？你玩我啊？

所以，我一度认为，无论杨过、乔峰、段誉、虚竹......全部都系广东人！

妙手仁心恐惧症

仲记得《妙手仁心》入边，根本唔存在发烧感冒。最湿碎嘅起码都系唐氏综合征、糖尿病，其他病基本过唔到“今晚”。

所以我由细到大都好惊睇医生。有一次扁桃体发炎，我仲控制唔住自己，问医生：“我仲有冇得救啊？”

畀车撞就会昏迷

畀车撞亲就会变成植物人，昏迷不醒。所以，我细个过马路特别小心。就算同阿妈去超市，畀部购物车轻轻撞到下，我都觉得要去医院睇急诊。

撞亲头就失忆

港剧十出剧，有八出都有失忆桥段。无论系车祸、跳楼、定系碌落楼梯，只要冚亲个头就会失忆！

更加神奇嘅系，只要再冚多次，记忆就会恢复！

的士扬下手就停

我好羡慕港剧嘅男女主角，无论咩时候，只要扬下手，的士就会停喺面前。

我喺路边截的士，十个有八个司机都会摇低车窗问我：“去边啊？”

同司机讲咗目的地之后，司机就会同我讲：“呢个钟数唔去天河啊！”

刀下留人

每次“午门斩首”，临斩落去嗰下，肯定会有人讲“刀下留人”，然之后嗰个人就会化险为夷。

所以，每次老窦准备郁手打我嗰时，我都会大嗌“拖下留人”（我老窦钟意用拖鞋），结果显示，咩用都冇！

卧底一定死

警匪剧，十个卧底，有九个都会畀人发现，跟住就畀人队冧。

所以我小学六年都唔敢做班长同班干部，因为要记同学仔名，督佢哋背脊。

发鸡盲杀手

按港剧教路，遇到杀手或者变态佬，匿埋喺梳发底或者床下底，就唔会畀佢哋发现。

所以每一次老窦准备“开拖”，我都会第一时间跑入房，匿喺床下底，但系每次都畀老窦捉出嚟，而且打得仲金！

✎开拖：打架，文中意为动手打儿子。

知得多，死得早

无论古装定时装，梗会有啲二打六知道咗一啲“惊天大秘密”之后，好快就畀人队冧。

所以五年级嗰时，偷听到同学仔阿爸阿妈离婚，嗰排我过马路都特别小心，饮啖水都怕畀人落毒。

✎二打六：无足轻重的小角色。

好多剧虽然都被奉为经典，

但越经典嘅剧，“水”得越多人！

港剧咩桥段“水”你最耐？